في السلك // بابكر سلك

اهمال وروزن بتلموا كيف !
ـ
*في زول اسمو روزن ايليكوف
*الزول ده ما زول ساي
*زول بلغاري
*وبلغاريا دي عاصمتها صوفيا
*وهي دولة اوروبيه عريقه
*وقديمه
*بعرفوها الاتراك من زمنا بدري
*المهم روزن دي زول بلغاري
*وما زول بلغاري ساي
*زول بلغاري عندو رخصة تدريب (A)
*الرخصه من الاتحاد الاوروبي
*يعني لا مجاملة ولا كانت في احتفالات ساي
*والرخصه (A ) ما هينه ولا لينه
*غارزيتو بي جلالة قدرو وبي شطارتو دي ما عندو
*روزن ده عندو
*من سنة الفين وسته جابها
*خدمة يمين وعرق جبين
*قبلها كانت عندو الرخصه (B)
*من سنة الفين
*الراجل متخصص في تدريب المراحل السنيه
*روزن ده في الوطن العربي بس
*درب القادسيه السعودي سنيه سنتين وشال معاهم بطولتين
*ودرب منتخب بلغاريا تحت سبعطاشر سنه
*ودرب القادسيه السعودي مساعدا للمدرب العالمي ديمتري ديمتروف
*ودرب الرفاع الشرقي البحريني الفريق الاول موسمين
*روزن ايلكوف رجل بهذه السيرة المحترمه
*استجلبه قطاع المراحل السنيه بالمريخ
*ليبني من الساس بناءا ثابتا وقويا يشيل مية طابق
*وروزن ده الاكتشف ياسر مهاجم الهلال السعودي لما كان بيلعب في سنية القادسيه
*يبقي زول بالمواصفات دي لاهين ولا لين
*والخطوه دي لم يسبق المريخ عليها زول في البلد دي
*ولا في البلاد المجاوره
*يبقي كيف المريخ بهمل المراحل السنيه يا هؤلاء ؟؟؟؟؟
*اذا كانت للناس بعض الحسابات الشخصيه
*يجب ان لا يزجوا بالمريخ في امورهم الشخصيه
*يحلحلوا مشاكلهم الشخصيه بعيدا عن المريخ
*ايها الناس
*في بعض الاقلام المحسوبة علينا
*عمرها ما كتبت حرفا يمدح المريخ
*عمرها ما كتبت حرفا يسند المريخ
*عمرها ما خدمت المريخ
*الاقلام دي كترتو
*وحقو تراجع نفسها قبل ما تقول الجماهير فيها كلمتها
*واذا قالت الجماهير كلمتها فيهم
*الا يشوفوا ليهم شغله تانيه
*لان شفوت المريخ يعرفون جيدا من يحفر للمريخ من اجل مصلحه رخيصه
*ومن يقاتل من اجل المريخ لاجل مصلحه عليا
*والارشيف لا يكذب
*ولما الجماهير تتحدث عن موضوع في النادي جهرا
*وتستند في حديثها علي الارشيف
*يبقي شكك مافي
*وحينها تتلاشي الاعذار ولا ينفع الاعتذار
*لاوقت لدينا لتحطيم الهمم
*ولا مجال عندنا لمن يعمل باستراتيجيه تخدم المعسكر الاخر
*فأكل العيش لايبرر ابدا ماتخطه تلك الاقلام
*كلامي واضح
*واذا ما واضح
*يمكنني ان اوضحه بالاسم وبالعدد وبالتاريخ وبالكلمة
*المهم
*يقولون ان قدامي لاعبي المريخ زعلانين من قصة المدرب بتاع السنيه
*والواقع يقول خلاف ذلك
*وكابتن سانتو افصح عن فرحتهم بهذا المدرب
*بل اضاف بانو شخصيا بحرص علي تدريبات هذا البروف
*عشان يستفيد
*وهاهو هيثم الرشيد
*ولدنا الجانا من الاشبال
*ولعب للفريق الاول
*ولم يبارح ساحات المريخ حتي بعد اعتزاله الكره
*وهيثم مهتم جدا بالمراحل السنيه
*وشفناهوا في كل التمارين والمباريات
*هيثم شدة ما مبسوط
*امس تبرع بشنطة طبيه كامله للمراحل السنيه سلمها في التمرين
*الزعلانين من قدامي اللاعبين ديل وين يا البتتكلموا عن زعل ؟؟؟
*تمرين امس فيهو الدحيش وجندي وعادل امين وهيثم
*ازيدكم ولا لسه ؟؟؟
*ايها الناس
*ايتها الاقلام التي تكتب لمصالح اخري ليست مصلحة المريخ واحده منها
*اصحوا
*الجمهور كشف المستور
*ايها الناس
*اهتمام بالمراحل السنيه زي الشفناهوا في المريخ ده
*بخلي اي ولي امر يختار لابنو المريخ
*مدرسة وتربيه وفن
*ايها الناس
*مجلس التسيير اصدر قرار باستمرار جميع القطاعات بي تشكيلها
*يبقي من وين لجنة التسيير ما دايره قطاع السنيه ؟؟؟؟
*الدقه وقت الكتابه بتطلع الزول من اللوم
*ايها الناس
*ايليكوف اسم سيقود المريخ الي آفاق ارحب
*كل المطلوب السند الجماهيري المادي والمعنوي للقطاع
*ولما يحين وقت الحصاد
*غير ثمارنا في السوق ما بتكون في ثمرة بتنافس
*ايها الناس
*اعادة قيد امير قطعت الكسكته حته حته
*وضربة بكري المدينه لسه مؤلمه
*ثاني هداف البطولة الافريقيه
*دي كمان قولوا كاريكا ؟؟؟؟
*ايها الناس
*لجنة التسيير لا لوم عليها
*جات في وقت صعب
*ووجدت تركة صعبه
*يقاتلون ليل نهار من اجل الصمود
*ساعدوهم بالجو الصحي والثقه
*واعادة قيد امير فيه دفعه معنويه للجماهير
*ولكن المفاجآت قادمه
*ساعدوهم بالصبر
*وونسي ورفاقه ليهم من الخطط ما يقودنا الي مانصبوا اليه
*فقط بيضوا النيه
*وان كانت المنصرفات وسقفها في السماء
*القصة ممكن تنزل تدريجيا وبخطة محكمه
*الصبر بجيب النصر
*فتسجيلات المريخ ليست من نوع ستة بي تسعين مليون
*ولا المحترفين ابو تلاته بي الف
*ونسي ما بطلع ونسه
*للرجل افكار تحتاج لمسانده منا وشفافيه منه
*ايها الناس
*غيب الموت اول امس
*ايمن احمد الزمزمي
*المريخي الغيور الشجاع
*الذي لايعرف ولا يعترف بكيان غير المريخ
*فغابت عن العرضه شمال شمس من شموسها المتوهجه
*واذ ينعيه شباب الحي بأسي شديد
*واخص منهم عثمان حسين وصديق ابو رغيفه
*ولكن لا حول لنا ولا قوة الا بالله
*ولن نقول الا مايرضي الله
*انا لفراقك محزونون يا ايمن
*اللهم اجعل الجنة مثواه
*وصبرنا واهله واجعل البركه في ذريته يا ارحم الراحمين
*فوالله فقدناك مثلما افتقدك اسعد واشرف وبهانا واكرم والتيمان
*ايها الناس
*ان تنصروا الله ينصركم
*اها
*نمشي لي شمارات والي الخرتوم
*كان شفت يا والينا
*امس للدايات مشينا
*اتضايقت زوجة اخوا لينا
*تعرف يا والينا
*من المغرب لي سته صباحا حتي جينا
*كل الجونا بنات يا والينا
*ده من شنو يا اخينا ؟؟؟
*من الجداد اللاحم الانطلق فينا ؟؟؟
*ولا من الهرمونات الكترت علينا ؟؟؟
*بنات الدايات اكتر من بنات المولد يا والينا
*اسي ديل بعرسوهن كلهن يا والينا ؟؟؟؟
*قدر ما نعرس بفضلن لينا
*الدباره كيف يا والينا ؟؟؟؟
سلك كهربا
ننساك كيف والكلب لما يشوف ولد في البيت بنطط ويهز ضنبو …بفرح شديد ..مامصدق
والي لقاء
سلك