خلى الخرخره وركز فى الجوهره

ﻓﻲ ﺍﻟﺴﻠﻚ

ﺑﺎﺑﻜﺮ ﺳﻠﻚ

* كالعاده
* خسر منتخبنا أمام زامبيا على أرض الحضارات
* هزيمة هزت جبل البركل وشبا
* وجهجهت موقف وطن الجدود فى المنافسه
* جدودنا الزمان الوصونا على الوطن
* على التراب الغالى الما ليهو تمن
* بالله من الزمن داك التراب ده غالى كده؟
* لورى المونه إلا يتشاركو سكان السكن العشوائى كلهم
* المهم إنهزمنا من زامبيا فى كريمى
* فرجعنا مع رقصة أهلنا الشوايقه لا ورا
* أيها الناس
* من كد وجد
* ونحنا نكد العمر كلو فى أصابعيننا حسرةً على ضياع فرص بالإهمال
* ونجد الفضيحه
* لأننا نكد فى أصابعيننا
* التاريخ يفتح صفحاته لنا
* فيسجل خيبات جديدة
* خيبات أمل
* حتى تعاطف الناس مع المنتخب مات وإفتقد العواطف
* وإفتقدنا سعادة الأمه بإنتصارات الصقور
* وإفتقدنا تعامل المنتخب مع جماهيره بوفاء
* منتخب يعيش فى إستعجال على علوق الشده مفتقداً للرزانه والسكينه
* فتلاشت مسيرات الفرح التى كنا نشارك فيها بإبتهاج
* حتى الأمنيات تلاشت من مخيلتنا وضاع المنى
* فتدهورت أميرة المناشط الرياضية
* ولنا على المنتخب حقين أضاعهما علينا
* حق ان ينتصر لأجلنا وحق ان يسمو بنا على روليت التصنيف
* فعشنا ضياع فى الحقين
* وحتى جلسات السمر بعد النصر ضاعت وماتت وحتى ذكرى نجاحات المنتخب تلاشت
* إختيارات لا يحالفها التوفيق تتخطى أصحاب المهارات الذين يتراشقون بالكريم
* وأصبحت شئون الصقور يتم التعامل معها بدون إخلاص
* فأظلم طريق المنتخب مفتقداً لومضة تسجل إشراقه فى دربه الطويل
* فأضحينا بدون أمل بدون عواطف بدون سعاده بدون وفاء بدون رزان بدون سكينه بدون إبتهاج بدون أمنيه بدون منى بدون أميره وضاعت أم حقين بدون سمر وبدون ذكرى
وبدون ريم وبدون إخلاص وبدون ومضه ودون إشراقه
* منتخب لاأمل ولا عواطف ولاسعاد ولا وفاء ولا رزان ولا سكينه ولا إبتهاج ولا أمنيه ولا منى ولا أميره ولا أم حقين ولاسمر ولا ذكرى ولا ريم ولا إخلاص ولاومضه ولا إشراقه
* ده منتخب ولا بيت عزابه؟
* أيها الناس
* الإهمال يدهور الأمور
* والصدفة لن تخلق بطلاً
* والتباكى لايقوى الناس
* والسكات عن الحق يجعلنا فى كشف الشياطين الخرس
* ولذا
* نلوم الدولة والوزارة والوزير الإتحاد والوزراء الولائيين والوزراء التانيين وكل الدستوريين وناس البرلمان النايمين منهم والصاحين والإتحاد وناس الجمعيه العموميه بتاعت الإتحاد
* يا منتخب زى المنتخب يفعل العجب
* يا امرقوا لينا بره بكل شجاعه وقوقوا لينا ما دايرين كورة
* وما دايرين منتخب
* وما مقتنعين بالرياضه ذاتو
* قولوها أصلو ما حا حيصل شئ
* القلتوهوا قبل كده الحصل ليكم شنو يعنى؟
* قولوهوا وهو البقولوهو الناس شويه؟
* أيها الناس
* بالطريقة دى كرة القدم تلحق المرحومه السله وطيبة الذكر الطائرة وفقيدة البلاد السباحه والشهيد التنس
* ووقتها نتمنى ان نحترم ميتنا وأن نكفنه ونصلى عليه ونواريه الثرى بكل إحترام
* وبعدها نذكر محاسن المرحوم
* كان يتلتل
* شال كاس افريقيا سنة سبعين
* وصل ميونخ قبل كده
* وولدو المريخ شال مانديلا
* خلينا واضحين يا دولتنا
* يعنى منتخبنا أغلى عليك من خط هيثرو؟
* المهم
* كردنه لسه ناسوا بجعجعوا
* وبدت المناظر بتاعت إفلام التسجيلات
* شيخ موكورو فى المطار
* شيخ موكورو رجع بى أمجاد
* قنبله جايبها العقيد حسن
* والعقيد حسن يقول
* هو العقيد القذافى قولوا عمل فيهو شنو؟
* وجعجعة أنصار كردنه متواصله
* العقوبات مافيها إيقاف لى كردنه
* يمكن الإيقاف جاييكم بى كرعينو
* يكونش الزول الجايب الخطاب ليكم عمل عملية ساعى البريد؟
* يكون شم العبير عجبو الكلام نايم عمل؟
* أيها الناس
* مايدفع كردنه للخرخرة هو الخوف من قفل الموسم والهلال مهزوم من المريخ وفاقد للدورى والكأس
* ومن المعروف إنو كردنه كراعو مع الهلال مكوه بس
* من جا الهلال ماغلب المريخ
* بل قبل ما يجى لما كان قطب
* لو صرح بى حوافز
* ابوالهل بتغلب
* وكردنه ما لمبى
* فاهمها
* عارف لو دخل مباراة المريخ وللمريخ فرصه فى نيل البطوله لو هزم الهلال
* المريخ بجى جاااادى
* ولو جا جاااااادى
* ناس أتير الغرام ومساوى وديل مابقدروا يقيفوا أمام العقرب
* بتشقلب بتشقلب
* تبقى عليهم هزيمه وفقدان بطوله وكاس وشقلبه كمان؟
* وزى ماقال روشا
* جرح بكرى لسه بينزف
* عشان كده إختار الخرخرة بدل المواجهه
* ياكردنه خلى الخرخره وركز على الجوهره
* المهم
* موافقة المجلس على التجديد لغرزه بشروط المجلس ضربة معلم
* وإشادة المجلس بقطاع السنيه وفاءٌ منه لأهل العطاء
* ونهمس فى أذن طارق المعتصم
* هنالك أسماء فى إدارة السنيه لها إيقاع أعيدوا سماعها من جديد
* أيها الناس
* إن تنصروا الله ينصركم
* أها
* نجى لى شمارات والى الخرتوم
* أكان شفت يا والينا
* الكوره دى بتشغلنا منكم وكت أصلكم ما شغالين بينا
* حقو يا والينا
* تهتموا بالكورة وتشتغلوا بيها لما تشغلوها لينا
* عشان تشغلنا من الشغل الدورتوهوا فينا
* لكن بالإهمال ده يا والينا
* تانى غيركم مابتكون فى شغله لدينا
* موش أخير تشتغلوا بيها عشان تشغلنا وكت تشغلوها لينا؟
سلك كهربا
** ننساك كيف والكلب راقد ممدد يهز فى ضنبو ويسمع فى وللأوطان فى دم كل حرٍ يدٌ سلفت ودين مستحق؟!
ﻭﺍﻟﻲ ﻟﻘﺎﺀ
ﺳﻠللللللك