قفلتوها (عمياء) ودايرين (تدُّكوا) القيم.؟

 

باص وخانة

أحمد دندش

*في لعبة (الضمنة) في حاجة اسمها (القفلة العمياء).!
*وشرح (القفلة العمياء)-لغير اللاعبين بها- هو انهاء (القيم) بغلطة (غبية) من احد اللاعبين.
*يعني مثلاً زول يخت نفس الرقم بالجهتين بدون مايقول (ورق).!
*ودا بالضبط العملوا كردنة.
*كردنة قفلا (عمياء) وداير القيم (يتدّكا).!
*معقولة بس.
*انت ياكردنة مابتعرف اصول (الدّك) ولاشنو.؟
*غايتو لو مابتعرف نوريك.
*في (الضمنة) الناس مابتدُّك ورقها الا في حالة توفر (دبُل) مع (البلاطة).
*اها.
* لو طبقنا القصة دي بنفس معايير اللعبة حنلقاك غلطان.
*حتقول لي كيف.؟
*اوريك.
*انت ياكردنة قبل ماتقفلا عمياء مش كان ورقك سمح.؟
*(دبُل) بالغلط سااااكت ماعندك.
*حتى (البلاطة) ماجاتك في التوزيعة.
*يبقى لما تجي وتقفلا عمياء حتطلع انت الغلطان.
*مافي زول بقفلا عمياء وورقو سمح وماعندو (البلاطة).
*غايتو عمليتك دي مافي زول (حريف) بتاع ضُمنة بعملا.
*وبعدين تعال اسألك سؤال.
*انت ليه ماقلتّ (ورق).؟
*هسي لو قلت (ورق) -وشاروت (الاحياء والاموات)- بالجد ماكان قفلتها عمياء.
*على الاقل الناس المعاك كانو قالوا ليك (على يدك).
*يعني لو قفلتها تتحمل المسؤولية.
*هسي بقت عليك اتنين.
*جماهير الهلال حملتك المسؤولية...والاتحاد وقفك من النشاط.
*تاني (لاضُمنة) و(لاكش ولد).
*غايتو الا تجرب تلعب (كمّبلت).
*و...
*و(كمبلتّ) ايد السعادة وضجت الاشواق عليها.!!

باص بيني:
*نكتب اليوم قبل مباراة منتخبنا الوطني ضد المنتخب الزامبي.
*و....
*الله يكضب الشينة.!!

باص طويل:
*لن نلوم المنتخب ولا حمدان حمد في حال الخسارة.
*اصلو (المابشوف من الغربال يبقى اعمى).!

باص قون:
*من اراد ان يضحك حتى يستلقى على ظهره فليتابع تسجيلات (ناس إعتصام)-الاسم الجديد لناس إعتماد-.!
*(ناس إعتصام) ماخلوا ليهم لاعب ما(قشطوهو) في الكشف.
*ودا كلو نتيجة طبيعية جداً لتغطية الآثار السالبة التى خلفتها قفلة كردنة (العمياء).!

خانة:
*وايه الدنيا...غير هدف...ومخاصمة قرف...وتسجيلات (من طرف).!!